बेलबारी बर्बरताः आखिर किन भएको रहेछ यो घटना ?

ज्ञान बाँड्ने ठाउँ विद्यालयमा बेलबारी ३ का स्थानीय बासिन्दाले सोमबार एक अबला नारीमाथि गरेको अमानवीय, बर्बर व्यवहारलाई देशका कुनै पनि ठूला मिडियाले कभर गरेनन्। राति ७ बजेर २४ मिनेट जाँदा मुख्य सचिव लिलामणि पौडेलले मोबाइलमा फोन गरेपछि मूलधारे मिडियाले बाल दिए पनि यो घटनामा राज्यको आँखासम्म त

पुगेको रहेछ है भन्ने भयो। मुख्य सचिवलाई प्रहरी र प्रशासनले गरेको ब्रिफिङ र मेरो स्रोत अनि त्यहाँका पत्रकारबाट प्राप्त जानकारी उत्तर-दक्षिणका छन्। आखिर किन भएको रहेछ त यो घटना ? 

सबैभन्दा पहिला मुख्य सचिव पौडेलले के भने ?

यत्रो बर्बर घटना भयो तर कुनै पनि मिडियाले त्यसलाई कभर गरेनन्। यो जानकारी तपाईँको साइटमा हेर्ने बित्तिकै मेरो मनमुटुसम्म असर गर्‍यो। मैले तत्काल प्रहरी र स्थानीय प्रशासनलाई फोन गरेर वास्तविकता बुझेर कारबाही अघि बढाउन निर्देशन दिएँ।

प्रहरीले मलाई दिएको जानकारी अनुसार ती युवती रक्सीले मातेको अवस्थामा आफूलाई जबर्जस्ती गर्न खोजेको भन्दै उजुरी दिएका रहेछन्। प्रहरीले तत्काल एक्सनमा गई युवकलाई चौकीमा ल्याई रातभर राखेर अनुसन्धान गरेको रहेछ। भोलिपल्ट उसले केही नगरेको भन्ने देखिएपछि छाडिएको थियो। यही बारेमा कुरा गर्ने भन्दै स्थानीयले त्यस्तो बर्बर काम गरेछन्। यो एकदमै गलत काम थियो। कानुन हातमा लिनेलाई कारबाही हुनैपर्छ, हामी गर्नेछौँ।

यो घटनापछि पनि उनीहरु प्रहरीकहाँ गई मिलापत्र गरेका रहेछन्। अब प्रहरीलाई कारबाही गराउन उजुरी नभएकोले प्राविधिक कठिनाइ भएको छ। तैपनि यस्तो घटनामा न्युजकै आधारमा भए पनि कारबाही गर्न सकिन्छ, गर्नुस् भनेको छु। तर यत्रो घटना हुँदा पनि कुनै मिडियाले कभर नगरेको देख्दा मलाई अचम्म लागेको छ।

तपाईँले सहयोग गर्न सक्नुहुन्छ कि कोही उजुरी गरिदिने, घटनामा को को संलग्न छन् भनेर जानकारी दिने ?

मैले दलित आयोग, महिला आयोगलाई पनि यो बारेमा अलर्ट गराइसकेको छु। त्यहाँबाट पनि केही होला।

सुरक्षाको कारण उजुरी गर्न नसकेका भए पुनर्स्थापना केन्द्र छ हाम्रो विराटनगरमा, त्यहाँ ल्याएर भए पनि के सकिन्छ गर्नुस् भनेर मैले निर्देशन दिएको छु।

मैले फोटो र भिडियोमा स्पष्ट देखिने भएकोले त्यसैबाट कारबाही गर्न मिल्दैन र, बरु म तपाईँलाई अनुहार प्रष्ट देखिने मलाई प्राप्त भिडियो इमेलमा पठाइदिउँला भनेँ। मुख्य सचिवले भने, ‘हुन्छ पठाइदिनुस् न त।’

यो भयो प्रहरीप्रशासनले मुख्य सचिवले चासो राखेर सिधै प्रश्न राखेपछि गरेको ब्रिफिङको आधारमा मुख्य सचिवले बनाएको घटनासम्बन्धी धारणा।

अब मेरो स्रोत र त्यहाँका स्थानीय पत्रकार घटना बारे के भन्छन् ? त्यो बुझौँ।

उनीहरु त यो घटनालाई सुनियोजित रुपमा गराइएको भन्छन्। पीडित दलित बहिनीले रक्सी खाएर आरोप लगाएको भन्ने आरोप सरासर गलत रहेको बताउँछन् पत्रकार गणेश लम्साल। सरकारी समाचार एजेन्सी राससमा समाचार पठाउने उनी नै थिए। “मैले अरु राष्ट्रिय मिडियामा पनि यो खबर पठाएको हो, किन नछापेको उनीहरु नै जानुन्’, उनी अगाडि भन्छन्, ‘रक्सी खाएर आरोप लगाएको भन्ने आरोप निराधार हो। म यहाँका प्रहरी अधिकारीसँग नियमित सम्पर्कमा छु। उनीहरुले त्यसो भनेका छैनन्”

भनेपछि तलको कुरा माथि ब्रिफिङ गराइँदा आफ्नो दोष लुकाउन कसले केसम्म भन्दा रहेछन् त ?

पुरानो रिसइबी

मुख्य सचिवसँग कुरा भए लगत्तै मैले यो समाचारमा आफ्नो नाम सार्वजनिक गर्न नचाहने स्रोतसँग कुरा गरेको थिएँ। उनले पनि लगभग यस्तै जानकारी दिए। साथमा घटनाको भित्री पाटो बारे अरु धेरै जानकारी दिए जसलाई यो घटनालाई नजिकबाट हेरेर स्थानीय मिडियामा समाचारसमेत फलोअप गरिरहेका लम्सालले पनि पुष्टि गरे। लम्सालले केही वर्षअघि आफूले लेखेको न्युज सम्झिए- एक १३ वर्षकी बालिकाको बलात्कार भएको घटना। त्यो यही गाउँमा भएको घटना रहेछ। बलात्कृत बालिका अहिले जुन युवतीलाई बर्बर यातना दिइयो, उनकी नन्द रहिछिन्।

कुरा के परेको रहेछ भने अहिले जुन केटाले बलात्कार गरेको भनेर युवतीले उजुरी दिएकी थिइन्, त्यो केटोको मामा ५७ वर्षका रामचन्द्र भेटवालले टिभी हेर्न गएको बेला बलात्कार गरेका रहेछन्। त्यतिबेला कालो मोसो दलिएका पत्रकार मनोज विश्वकर्मासहितको समूहले घटनालाई चर्काएर अदालतसम्म पुर्‍याएका रहेछन्। तर फैसला हुनुअघि नै पाँच कट्ठा जग्गा बालिकाको नाममा दिएर यो मुद्दामा मिलापत्र गरिएको रहेछ।

यो सम्बन्धी समाचार इन्सेकमा अझै देखिन्छ-

दल र दलित प्रतिनिधिको पहलमा बालिका बलात्कार घटना जग्गा दिएर मिलापत्र
मोरङ । साउन १८ गते
बेलबारी गाविस-३ की १३ वर्षीया बालिका बलात्कार घटनाका आरोपित ५७ वर्षीय रामचन्द्र भेटवालले पीडितलाई पाँच कठ्ठा जग्गा दिएर ०६८ साउन १७ गते मिलापत्र गरेका छन्।
सो कुराको पुष्टि दलित उत्थान वर्ग समन्वय समिति बेलबारीका अध्यक्ष डम्बर तोलाङ्गीले गरेका छन् । पीडितलाई जग्गा दिलाउन राजनीतिकदलका प्रतिनिधि र आफ्नो पहल भएको अध्यक्ष तोलाङ्गीले बताए।
आरोपितले मालपोत शाखा कार्यालय बेलबारीमा पीडितका नाममा काका मिलन संरक्षक हुने गरी सो जग्गा ०६८ साउन १७ गते पास गरिदिएका हुन्। पीडितलाई ०६८ साउन १४ गते आरोपितको घरमा साँझमा टेलिभिजन हेर्न गएको समयमा बलात्कार गरिएका थियो । सो घटनाबारे उजुरीनआएको पत्रपत्रिकाबाट मिलापत्र गरिएको जानकारी पाएको इलाका प्रहरी कार्यालय बेलबारीका प्रमुख दुर्गा थापाले बताए।
दीपेन नेउपाने
Posted on : 2011-08-03 14:30:08
स्रोतः इन्सेकअनलाइन

स्वयं गणेश लम्सालले जनआस्थामा यस्तो लेखेका छन्

मोरङको बेलबारी-३ करम डाँडामा ५५ वर्षका भेटवाल थरका वृद्धले छिमेकी दलित थरकी एक युवतीलाई बेलुका घरमा टिभी हेर्न आएको मौका पारी यौनकार्य गरे। त्यो कुरा गाउँलेले थाहा पाएपछि उनले आफ्नो इज्जत जोगाउन बालिकाको नाममा पाँच कठ्ठा जग्गा नै क्षतिपूर्तिबापत पास गरिदिनुपर्‍यो।
साभारः जनआस्था

घटनाको भिडियोमा पनि त्यो जग्गा जसरी भए पनि हाम्रो नाममा पास गर्छौँ भनेको सुनिन्छ अन्तिमतिर सुन्नुस् त।

[केही बढी जान्ने उपबुज्रुकहरुले युट्युबको यो भिडियोमा फ्ल्याग गरिदिएकोले यो भिडियो युट्युबले हटाएको छ। मैले अपिल गरेको छु, स्वीकार भएमा भिडियो फेरि हेर्न पाइनेछ।
केही साथीहरुले यो भिडियोलाई अरु साइटमा अपलोड गरेका छन्। लाइभलिकबाट भिडियो हेर्न क्लिक गर्नुस् डेलीमोसनबाट यो भिडियो हेर्न क्लिक गर्नुस्। युट्युबमा अर्कै साथीले अपलोड गरेको भिडियो हेर्नुस्

]

पीडित दलित

‘यो घटना के निहुँ पाउँ कनिका बुझाउँ भएको हो स्थानीय बासिन्दाका लागि,’ लम्सालले त्यो ठाउँबारे बताए, ‘घटना भएको बेलबारीको करमडाँडामा मात्र तीन दलितको परिवार बस्ने गर्छन्।’ बाँकी सबै कथित ठूला जातिका। तीन जनामा एक पीडित युवती भइहालिन्। अर्का मनोज दाजुभाइ। मनोज विश्वकर्मा स्थानीय ‘फाइट’ साप्ताहिकका कार्यकारी सम्पादक र दलित अगुवा पनि। उनीहरुले तीनै जनालाई मोसो दलेका थिए। रक्सीले टिल्ल भएका पत्रकारले झगडा गर्दा कुटाइ खाँदा पनि विरोधको वक्तव्य निकाल्ने पत्रकारहरुको छाता सङ्गठन भनिने नेपाल पत्रकार महासङ्घलाई पत्रकारलाई अपमान गर्दा कागजी वक्तव्य निकाल्न पनि चासो छैन।

लम्सालका अनुसार बलात्कार घटनापछि ५ कट्ठा जग्गा दिनुपरेको पुरानो इबी साँध्न उनीहरुले सुनियोजित रुपमा यो घटना गराएको हुनुपर्छ। राष्ट्रिय मानवअधिकार आयोग, दलित आयोग, महिला आयोग सबका सब सुतेर बसेका छन्, कसले गर्ने घटनाको निष्पक्ष अनुसन्धान ?

आफूमाथि अन्याय, अत्याचार भएपछि पीडित महिला जाने कहाँ ? पक्कै पनि चौकीमा हो। अनि आफूले श‌ंका गरेको मान्छे भन्ने हो। अनुसन्धान गर्ने काम प्रहरीको हो। अनि ती महिलाले त्यही गर्दा आरोप लगायो भन्न मिल्यो र ? आरोप हैन भन्ने प्रमाणित भयो भने त प्रहरीले छाडिहाल्छ नि। चौकीमा राखेको राख्यै गरेको पनि हैन, छाडेकै हो। अनि यही कुरालाई लिएर स्कूल जस्तो सार्वजनिक ठाउँमा एक अबला नारीलाई त्यस्तो अत्याचार गर्ने ?

उजुरीको कुरामा, प्रहरी प्रशासनले चाह्यो भने बिना उजुरी कोही पनि मान्छेलाई थुन्न सक्छ। आँखै अगाडि भएको यत्रो अत्याचारको घटनाको प्रमाण छँदाछँदै उजुरी चाहिने ? मानवअधिकार उल्लङ्घनको घटनामा उजुरी !

पीडित बहिनी विस्थापित, सम्पर्कविहीन

किन उजुरी दिँदैनन् त उनीहरु ?
कसरी दिने ?
उनीहरुको उठिबास लाग्छ त्यहाँ। सुरक्षाको कुरा छ। कुरा गर्ने भनेर सार्वजनिक विद्यालयमा बोलाएर त्यस्तो अत्याचार गर्ने जंगली भिडको अगाडि उनीहरु भविष्यमा कसरी बस्ने ? मनोज भन्दा रहेछन्- ‘हाम्रो उठिबास लाग्छ, हामीलाई कसले सम्हाल्छ, हामीलाई कसले नेतृत्व दिन्छ ? हामीलाई केही भयो भने को जिम्मा ?’

उता ती पीडित बहिनी विस्थापित भइसकेकी छिन्। उनको घरमा ताला लागेको छ। उनी सम्पर्कविहीन छिन्।

लौ अब भन्नुस्, कसले उनीहरुलाई नेतृत्व दिने? ठूल्ठूला कुरा गर्न सजिलो छ,ससना कुरा पनि गर्न गाह्रो छ। यदि त्यो कुरा अत्याचार हो भने त्यसलाई टुलुटुलु हेरेर बस्ने हामी सबै पनि दोषी हौँ। यी आवाजविहीनहरुको आवाज तपाईँहरु सामु ल्याउन यी केही शब्द टाइप गर्न बाहेक मैले केही पनि गर्न नसकेकोमा म आफैलाई लज्जित ठान्दैछु। हो, म पनि दोषी छु ! तपाईँ नि ? कथित ठूलो जातिको अहङ्कारबाट मुक्त भएर एक पटक सोच्नुस् त!

साभार : माई संसार