उनीहरु त शाहरुख, सलमान र ऋतिक रोशन मात्रै ताक्छन्

काठमाडौ, मंसिर १३ - सबै बलेकै आगो ताप्ने हुन् । यतिबेला बलिउडमा बलेका नायक भनेका खान, कपुर नै हुन् । जति उमेर ढक्लिँदो छ, उति शाहरुख, सलमान र आमिर खानका फिल्मले बक्सअफिसमा एकपछि अर्को रेकर्ड राख्न

थालेका छन् भने रणवीर कपुर, ऋतिक रोशन पनि त्यही लाइनमा छन् । नायकका कारण नायिका उपेक्षित भइरहेको चर्चा चलिरहेका बेला 'गदर', 'बोर्डर' जस्ता फिल्मबाट नायक सनी देवलले भने आफू चल्तीका नायिकाबाट पीडित बन्नुपरेको दुःखेसो गरेका छन् । उनले फिल्ममा को-स्टार नपाएको दुःखेसो पोखेर धेरैलाई आश्चर्यमा पारे ।

'स्थापित नायिकाबाट मैले समस्या खेप्नुपरेको छ । राम्रोसँग चिनिएका नायिकाहरू पनि मसँग काम गर्न रुचाउँदैनन् । सत्य हो यो,' १९ वर्षीया उर्वशी रौतेलासँग जोडी बनेर फिल्म 'सिंह साब द ग्रेट' मा देखिएका ५७ वर्षीय नायकले नायिकाप्रति दुःखेसो पोखे, 'टप हिरोइनहरुलाई मसँग काम गरौं न भन्यो भने वास्तै गर्दैनन् । उनीहरु त शाहरुख, सलमान र ऋतिक रोशन मात्रै ताक्छन् ।'

यसै कारण पनि उनी आफ्ना फिल्ममा स्थापित र चल्तीका भन्दा नयाँ युवती नै नायिका हुने प्रस्ट्याउँछन् । पछिल्लो फिल्मबाट राम्रो प्रशंसा बटुलिरहेका सनीले को-स्टार उर्वशीसँगको केमेस्ट्रीबारेमा असहज मान्दैनन् । बरु भन्छन्, 'हामीले अभिनय गरेका हौं । वास्तविक पति-पत्नी त होइनौं नी । यदि उनी साह्रै भर्खरकी देखिन्छन् भने पनि के भयो त ? धेरै दुलहीका उमेर दुलाहाको भन्दा निकै कम नभएको पनि त होइन ।' त्यसो त सनी देवलको फिल्मी करिअर नै उर्वशीको उमेरभन्दा ११ वर्षले जेठो छ ।

सनीले चलेका हिरोइन लिँदा खेप्नुपर्ने अनावश्यक नखरा न्युकमरबाट नपर्ने फाइदा रहेको जनाउँदै थपे, 'हामीकहाँ नयाँ कलाकारमा पनि अधिक क्षमता छ । राम्रा पनि छन् । फेरि उनीहरूलाई लिएर फिल्ममा स्थापित भए भने त्यसको क्रेडिट पनि आउँछ ।'

साभार : ई कान्तिपुर