आइजीपीले मोडलिंग गर्दा प्रहरीको प्रतिष्ठामा धक्का

काठमाडौं। नेपाल प्रहरीका आइजीपी कुवेरसिंह रानाले एउटा व्यापारिक संस्थाको व्यापार प्रबर्द्धनका लागि सुरक्षाफौजको मर्यादा नै भुलेर मोडलिङ गरेका छन्। २०७० जेठ ७ गते निजी क्षेत्रको मोवाइल कम्पनी एनसेलले आइजीपी रानालाई ब्यापार
प्रबर्द्धनका लागि मोडलिङ गराएको फोटो पत्रपत्रिकाहरूमा सार्वजनिक गरेको छ। एनसेलले महानगरीय प्रहरी आयुक्तको कार्यालयलाई ट्राफिक व्यवस्थापनका लागि बीसवटा बजाज मोटरसाइकल र एघारवटा ल्यापटप कम्प्युटर दिएबापत आइजीपीलाई नै आफ्नो व्यापारको मोडेलका रुपमा पस्किएको छ। नेपाल प्रहरीका आइजीपी सहित उच्च अधिकृत एनसेलको ब्यापार प्रवर्द्धनमा मर्यादा नै भुलेर सहभागी भएका थिए। सहयोग आदानप्रदान गनर्ेे कुरालाई सहज रुपमा लिइए पनि आइजीपी जस्तो पदलाई विज्ञापनको बस्तु बनाइनु हुँदैनथ्यो, एक प्रहरी अधिकृतले भने।
आइजीपीलाई सुरक्षाफौजको मर्यादा र आचारसंहिता विपरीत एनसेलको मोडल बनाइएकोमा प्रहरीभित्रै यसलाई राम्रो कार्य मानिएको छैन। प्रहरी नेतृत्वलाई सहयोग गरेकै भरमा कुनै व्यापारिक संस्थाको स्वार्थमा आइजीपी प्रयोग हुनु राम्रो होइन, आइजीपीलाई विज्ञापनको मोडल बनाउन जसजसले सल्लाह दिए यो संगठनको हितमा छैन भन्ने टिप्पणी भइरहेछ। आइजीपी राना सशस्त्र प्रहरी बलका पूर्वडीआइजी महेन्द्र भट्टचनको डिजाइनमा एनसेलको मोडल बनेको बताइन्छ। भट्टचन हाल एनसेलको सुरक्षा प्रमुखका रुपमा काम गर्दछन्। एनसेलको ब्यापारिक स्वार्थमा आइजीपी प्रयोग हुनु पदीय दुरुपयोग पनि हो, एक उच्च प्रहरी अधिकृतले भने।
प्रहरीकै इतिहासमा पहिलोपल्ट आइजीपीलाई मोडल बनाइएकोबारेमा प्रहरी प्रवक्ता डीआइजी केशव अधिकारीले भने–’नेपाल प्रहरीसँग स्रोतसाधनको कमी छ। एउटा संस्थाले निःशुल्क सामग्री सहयोग गर्छु भन्यो। त्यही सामान स्वीकार गरिएको हो। प्रहरीले विज्ञापन गरेको छैन।’ आइजीपीलाई मोडलका रुपमा प्रचार गरिएकोबारेमा उनको प्रतिक्रिया थियो, त्यो पाटो हेर्नुहुँदैन। आइजीपीले मोटर साइकल चढ्नु हस्तान्तरण कार्यक्रममात्र हो। मोडलिङ होइन। मुख्य कुरा सहयोग हो। स्रोत साधन दिनेले प्रहरी नेतृत्वलाई जसरी पस्किन पाउँछ त भन्ने प्रश्नमा भनेउनले कुनै प्रतिक्रिया दिन चाहेनन्। प्रहरीलाई भोलि अपराधिक पृष्ठभूमिका मानिसले स्रोतसाधन दिएर जे पनि गर्ने छुट पाउँछन् त भन्ने प्रश्न पनि उठेको छ। ब्यापारिक संस्थाको स्वार्थमा प्रहरी प्रमुख नै मोडल बनेपछि यो प्रश्न पनि उठेको हो।
एनसेलले नेपाल प्रहरीलाई तीनबर्षभित्र साठीवटा मोटरसाइकल दिने प्रतिबद्धता पनि गरेको महानगरीय प्रहरी आयुक्त कार्यालयका एसपी धिरजप्रताप सिंहले जानकारी दिए। उनले भने, अहिले एघारवटा ल्यापटप र बीसवटा मोटरसाइकल दिएको छ। ‘सहयोगीहरूसँग हातेमालो गर्ने नेपाल प्रहरीको नीति अनुसार एनसेलबाट ती सामान स्वीकार गरिएको’ बताए।
स्रोत  :http://www.weeklynepal.com/2013/05/28/igp-model-banda-police-lai-dhakka/