पीडाका बेला चरम आनन्द प्राप्त गर्ने कुरा हुँदैन।

म २९ वर्षीया विवाहित महिला हुँ। हिजोआज मेरो श्रीमान्सँगको यौनसम्पर्कका क्रममा झगडा हुन्छ। मलाई यौनसम्पर्कको समयमा पीडा अनुभव हुन्छ। पीडाका बेला चरम आनन्द प्राप्त गर्ने कुरा हुँदैन। विगत एक वर्षदेखि ममा यौनसँग सम्बन्धित विभिन्न किसिमका समस्या देखिएपछि उपचारको प्रयास पनि गरें। पटक-पटक विभिन्न किसिमका औषधि पनि खाएँ। उपचारबाट केही समय राहत मिले पनि समस्या बल्झिरहन्छ। उहाँ मेरो समस्यालाई आधार बनाएर परपुरुषसँग सम्पर्क छ कि भन्ने शंका गर्नुहुन्छ। समस्याबाट पार पाउने केही उपाय छ कि मैले जीवनभर यो समस्या झेल्नुपर्ने हो ?

पी. 

धेरै अवस्थामा यौन चेतनाको कमी र कहिलेकाहीं सम्पर्कका बेला असावधानी अपनाउँदा धेरै मानिस यौनजन्य रोगको समस्यामा पर्छन्। समयमा उपचार नहुँदा रोग लामो समयसम्म रहने मात्र नभै साथीलाई समेत सर्न सक्ने खतरा हुन्छ। यसका भावनात्मक एवं मनोवैज्ञानिक असरहरू पनि छन्। यौनरोगहरू धेरैजसो पुरुषबाट महिलामा संक्रमित भए पनि महिलाहरू नै यस्ता रोगबाट बढी प्रताडित हुने गरेका छन्। धेरैजसो यौनरोगको लक्षण  पुरुषमा भन्दा महिलामा चाँडो देखिने भएकाले कोबाट यो पहिले संक्रमित भएको हो भन्नेमा पुरुष र महिलाबीच विवाद हुने गरेको छ। यस्ता घटनाहरूमा पुरुषले महिलामाथि दोषारोपण गर्ने गरेको पाइन्छ। यो सही होइन। फेरि यौनरोगको उपचार गर्ने काममा पनि पुरुषहरू पन्छिन्छन्। यस्तो रोग पुरुषबाट महिलामा संक्रमित भएको हुन सक्छ र महिलामा छिटो देखिएको हुन सक्छ, तर सँगसँगै पुरुषमा पनि संक्रमण भैसकेको हुन्छ, यद्यपि त्यसको जानकारी नहुनसक्छ। यस्तो अवस्थामा दुवै जनाले यौनरोगको उपचार गराउनुपर्ने हुन्छ। एकजनाको मात्र उपचारले कहिल्यै यौनरोग निको हुँदैन। यो एकबाट अर्कोमा सरिरहन्छ। त्यसैले दुवै जनाले एकसाथ उपचार गराउनुपर्ने हुन्छ। 

जहाँसम्म यौनरोग भएको मानिसले यौन आनन्द लिने कुरा छ, शारीरिक एवं मनोवैज्ञानिक हिसाबले नै उनीहरू यौन आनन्द लिन सक्दैनन्। यौन सम्बन्धका बेला पीडा भयो भने चरम आनन्द महसुस गर्न सकिँदैन। यस्ता समस्यालाई चिकित्सकीय भाषामा डिस्पेरियुनिया भनिन्छ। यौनरोग बढ्दै गएको अवस्थामा डिस्पेरियुनिया हुन्छ। विशेषगरी गोनोरिया र क्ल्यामेडियाको संक्रमण छ भने यौन सम्पर्कका बेला पीडा महसुस हुन्छ। कतिपय महिलालाई गोनोरिया र क्ल्यामेडियाको संक्रमण भएको छ भने लामो समयसम्म लक्षण देखिँदैन। तैपनि यौनसम्बन्ध राख्दा पीडा महसुस हुन्छ। लामो समयसम्म यसको उपचार नगर्ने हो भने महिलाले गर्भधारण गर्न सक्ने क्षमतामा ह्रास आउन सक्छ। यौनरोगका कारण मनमा नकारात्मक असर पर्छ र त्यसले मुडमा असर पार्न सक्छ, जसको सीधा असर यौन आनन्दसँग हुन्छ। जुनसुकै किसिमका यौनरोगले मानिसलाई पीडा दिन्छ। यस्तो रोग लागेको अवस्थामा दुख्ने, पोल्ने, चिलचिलाउने भएकाले मानसिक तथा भावनात्मक रूपले हैरानीको अवस्थामा पुगेको हुन्छ। पीडाको यस्तो अवस्थामा हुने यौनले कसरी आनन्द दिन सक्छ ? अर्को कुरा आफूलाई यौनरोग लागेको छ भन्ने थाहा भैसकेपछि यौनसम्पर्कको अवस्थामा एकले अर्कोलाई त्यो रोग सारिरहेकोमा हीनताबोध र ग्लानि महसूस भैरहेको हुन्छ। यौन रोग छ भने यस्तै प्रकारको असर महिलामा मात्र नभै पुरुषमा पनि हुनसक्छ। 

रोगले मूलत: दुई किसिमले असर गर्छ। यौन आनन्द लिने कुरा त के, रोग बिस्तार हुँदै जाँदा त्यसले जीवनलाई नै अस्तव्यस्त बनाइदिन्छ। लामो समय उपचार नगरिँदा मनमा आउने नकारात्मक सोचले तत्कालको मनस्थिति बिगारिदिने मात्र होइन, दीर्घकालमा मनोवैज्ञानिक समस्याको रूप धारण गर्न पुग्छ। जब मानिस मनोवैज्ञानिक रूपले कमजोर हुन्छ, ऊ थप जटिल अवस्थामा पुग्छ। मनोविज्ञान भन्छ, 'मानिसलाई शारीरिक समस्याले भन्दा मानसिक समस्याले बढी सताउँछ। त्यसैले शरीरका साथै मानसिक अवस्था पनि सन्तुलित हुनुपर्छ। 

जहाँसम्म तपाईंको समस्या छ, एकपटक तपाईंहरू दुवैले राम्रो चिकित्सकसँग उपचार गराउनुपर्छ। तपाईंहरूको अवस्था बुझ्न मनोविज्ञसँग भेट्नु पनि आवश्यक हुन्छ। कहिलेकाहीं समस्या शारीरिकभन्दा बढी मानसिक हुन्छ। तपाईंहरू दुवैले झगडा गरी एक-अर्कालाई दोषारोपण गर्नुभन्दा छिट्टै  उपचार गराउन अनि मानसिक असरबाट मुक्तिका लागि मनोविद्सँग परामर्श गर्न ढिलाइ गर्नु हुँदैन।