आफ्नो बखान गरेको छैन - हरिवंश आचार्य

‘चिनो हराएको केटो’ नामक आत्मकथा लेख्दै गरेका कलाकार हरिवंश आचार्य भन्छन्, “म जे छु त्यो सजिलै प्राप्त भएको होइन रहेछ भन्ने स्वीकारोक्ति पुस्तकमा छ ।”

चिनो हराएको केटो कस्तो किताब हो ? 

मेरो आफ्नै जीवनी हो । बाल्यकालदेखि अहिलेसम्मका उल्लेखनीय घटना यसमा समेटेको छु । मदन दाइ (मदनकृष्ण श्रेष्ठ) सँगको सहकार्यका धेरै

प्रसङ्गहरूको खुलासा यो पुस्तकमा पाउनुहुनेछ ।

पाठकले कहिलेसम्म पढ्न पाउनेछन् ? 
यही चैतभित्रै लेखेर सक्ने र वैशाखको पहिलो सातासम्म पाठकको हातमा पुर्‍याउनुभएको योजना छ । मेरी दिवंगत पत्नी मीराको दोस्रो स्मृति दिवस पारेर ७ वैशाखमा पुस्तक सार्वजनिक गर्ने कार्यक्रम छ ।

यो पुस्तक लेख्नुको उद्देश्य के हो ? 
हरिवंश आज जे छ त्यो सजिलै बनेको होइन रहेछ भन्ने जानकारी पुस्तक पढेपछि पाठकहरूलाई हुनेछ । हरेक मान्छेमा केही न केही सकारात्मक गुण हुन्छन्, जुन अरूका लागि पनि रुचिकर र अनुकरणीय हुनसक्छन् भनेर आफ्नो कुरा पाठकसँग बाँड्न खोजेको हुँ ।

अरू आत्मकथा र यसमा के फरक छ ?
आत्मकथा पढिसक्दा हरिवंश भन्ने मान्छे पनि अरू जस्तै साधारण रहेछ भन्ने यथार्थ बोध हुनेछ, पाठकलाई । छोटोमा भन्दा हरिवंश ठूलो मान्छे होइन भन्ने सत्य सबैले थाहा पाउनेछन् । पर्दा र मञ्चमा हँसाउने मान्छेका गम्भीर कुरा यसमा पढ्न पाउनुहुनेछ ।

नेपाली आत्मकथामा लेखकीय इमानदारी नरहेको बताइन्छ । तपाईंले यसमा ध्यान पुर्‍याउनुभएको छ ?
जुन विषय समाज र व्यक्तिका लागि पनि हानिकारक हुन्छ, त्यो नलेख्दा नै बेस । तर, अहिलेसम्म बाहिर नआएका धेरै विषय र घटनाको खुलासा गरेको छु । आफ्नो बारेमा बढाइँचढाइ नहोस् भन्ने पनि ध्यान दिएको छु ।

--हिमालखबर