विराटनगर- 'म बोलेको, कस्तो नचिनेको डार्लिङ, म तिम्रै मान्छे त हो।' यो वाक्य जिल्ला प्रहरी कार्यालय मोरङको कन्ट्रोल रुममा रहेको १०० नम्बरको फोनमा आउने ब्लफकलको हो। प्रहरीलाई फोन गर्नेहरूले यौनसम्बन्धको प्रस्ताव गर्ने, अश्लील शब्द प्रयोग गर्दै गाली गर्ने र मायामा लिप्त भएझैं गरेर फोनबाटै म्वाइँ खानेसम्मका हर्कत गर्छन्। यसरी ब्लफ कल कुनै एक प्रहरी जवानको मोबाइल फोनमा आएको पनि होइन, जिल्ला प्रहरी कार्यालयको कन्ट्रोल रुममा ब्लफ कलबाट अश्लील गाली गर्नेदेखि यौनसम्बन्धको प्रस्तावसम्म राख्न थालेपछि प्रहरीहरू हैरानीमा परेका छन्।
यस्तै क्रियाकलाप गरेर यौनप्रस्ताव गर्ने एक व्यक्तिलाई मोरङ प्रहरीले पक्राउसमेत गरेको छ। ब्लफ कल गरेर हैरानी दिनेहरू थोरै मात्र कारबाहीमा परेको अवस्थामा प्रहरीले फोन गरेर विभिन्न धाक-धम्की दिएको भन्दै दादरवैरियाका रमेश राय अमातलाई पक्राउ गरेको हो। रायले सुरक्षामै आँच आउने गरी गतिविधि गरेको आरोपमा केही सार्वजनिक अपराध ऐनअन्तर्गत मुद्दा चलाइएको मोरङ प्रहरीले जनाएको छ। प्रहरी कार्यालयमा ब्लफकल गरेर हैरानी दिनेमा महिलाहरूको संख्या बढी रहेको जिल्ला प्रहरी कार्यालय, मोरङका प्रहरी उपरीक्षक विश्वराज पोखरेल बताउँछन्। मोरङ प्रहरी कार्यालयमा संखुवासभा, पाँचथर, धनकुटा, झापाका साथै इलामबाट पनि ब्लफकल आउने गरेको छ।
प्रहरीलाई फोन गरेर इत्रिने, गाली गर्दा पनि अटेर गर्ने र उल्टै जिस्क्याउनेहरूमा अधिकांश महिला रहेको मोरङ प्रहरीले जनाएको छ। ब्लफकल गर्नेहरूले बच्चालाई बोल्न लगाउने, नबोली सुनिरहने, अश्लील मात्र बोल्ने तथा जिस्क्याउने भुक्तभोगी प्रहरीहरू बताउँछन्। ब्लफकल गर्नेहरूमध्ये पुरुषले महिला प्रहरीलाई जिस्क्याउँछन् भने महिलाहरूले पुरुष प्रहरीसँग त्यस्तो व्यवहार गर्छन्। जिल्लाभित्रबाट फोन गर्नेलाई पक्राउ गर्न सकिए पनि जिल्लाबाहिरबाट फोन गर्नेलाई पक्राउ गर्ने विषय प्राथमिकतामा नपर्ने भएकाले उनीहरू कारबाहीको दायरामा आउन सकेका छैनन्।
साभार : साप्ताहिक
0 Comment:
Speak up your mind
Tell us what you're thinking... !