आखिर कहाँ हरायो मलेसियाली विमान ?

शनिबारदेखि हराइरहेको मलेसिया एयरलाइन्सको बोइङ विमान खोजिरहेका अनुसन्धानकर्मीहरु र तपाईँ हामीबीच एउटा समानता छ- दुवैलाई थाहा छैन, आखिर यत्रो ठूलो विमान कहाँ बेपत्ता भयो ? किन तीन दिन भइसक्दा पनि विमान वा विमानको भग्नावशेषका कुनै संकेतमात्र पनि कतै भेटिएका छैनन् ? खोई २ सय ३९ जना चढेको विमान ? खोई ?? खोई ???

जवाफ उनीहरुसँग पनि छैन, जवाफ हामीहरुसँग पनि छैन। उनीहरु पनि उपलब्ध सबै संभावनाहरुलाई लिएर खोजी गरिरहेका छन्, हामीले त झन् अरु गर्न सक्ने कुरै भएन। जति समय घर्केँदै गएको छ, मलेसियाली विमान बेपत्ता प्रकरण झन् झन् रहस्यमय बन्दै गइरहेको छ।

यसरी हराएको थियो विमान

माथिको चल्ने चित्र फ्लाइट राडारबाट लिइएको हो। विमानमा रहेको राडारले देखाएको संकेतका आधारमा विमान कहाँ कहाँ पुग्यो हेर्न मिल्छ फ्लाइटराडार२४ वेबसाइटमा।

मलेसिया एयरलाइन्सको MH370 विमान पनि त्यसमा देखिएको थियो। क्वालालम्पुर अन्तर्राष्ट्रिय विमानस्थलबाट मध्यरात १२ बजेर ४१ मिनेटमा उडेको थियो। बेइजिङमा त्यहाँको समय अनुसार साढे ६ बजे अवतरण गर्नुपर्ने थियो। तर उडान भरेको ४० मिनेट मै समुद्रमाथि उड्दाउड्दै त्यसको सम्पर्क टुटेको देखिन्छ।

मलेसियाको टावरसँग भने बिहान २ बजेर ४० मिनेटमा सम्पर्क टुटेको थियो।

किन टुटेको रहेछ त ? न त्यहाँ मौसम खराब थियो, न विमानले केही संकेत दिएको थियो कन्ट्रोल टावरलाई। किन भन्ने जवाफ नै अहिलेसम्म पाउन सकिएको छैन।

अपहरण भएको हो कि ?
आतंकवाद, अपहरणको पनि संभावनालाई अनुसन्धानकर्मीहरुले नकारेका छैनन्। त्यहाँमाथि दुई जनाले नक्कली पासपोर्ट देखाएर विमानमा चढेको भन्ने पुष्टि भइसकेको छ।

तर अपहरण भए पनि केही संकेत त विमानबाट आउनु पर्थ्यो ! अपहरण गरेर कतै लगेको भए पनि अहिलेसम्म केही न केही त जानकारी आइहाल्थ्यो। त्यत्रो ठूलो प्लेन भनेको खेलौना प्लेन जस्तो लुकाएर राख्न त मिल्दैन पक्कै।

फेरि चोरिएको पासपोर्ट हुँदैमा आतंकवादी नै थिए भनेर भन्न पनि मिल्दैन रे। शरणार्थी वा अन्य विभिन्न कारणले पनि त्यसरी नक्कली कागजातमा यात्रा गर्ने गर्छन् भन्ने कुरा पनि आयो।

झ्याप्पै विमान राडारबाट कसरी हरायो त त्यसो भए ? प्रमाण त छैन तर शंका- त्यसमा राखिएको बम पड्‌‌किएर आकाशमै विस्फोट भएर टुक्राटुक्रा भई समुद्रमा खसेको पो हो कि !

त्यो हो भने पनि त्यत्रो पानी जहाज र हवाई जहाज लगाएर खोजिएको छ, केही न केही संकेत त भेट्टिनु पर्थ्यो नि। किन अहिलेसम्म केही पनि नभेटिएको होला ?

विमानमा प्राविधिक समस्या पो आएको हो कि ?

त्यो हो भने पनि यस्तो भयो है भनेर चालक दलका सदस्यले टावरलाई सूचना चाहिँ दिन भ्याइहाल्थ्यो।

त्यसो भए पाइलटले नै सुसाइड गर्छु भनेर समुद्रमा लगेर जोतेको पो हो कि। अथवा अपहरणकर्ताले के के पो माग राखेकोले अमेरिकामा ९/११ मा जस्तो यात्रुहरु मिलेरै प्रतिकार गर्दा बमसम पड्केर ध्वस्त पो भएको हो कि। त्यतिञ्जेल पनि टावरलाई संकेत त पठाउन मिल्थ्यो होला।

घरको कुकुरसमेत हराउला भनेर जिपिएस राखेर ट्रयाक गर्ने आधुनिक जमानामा यत्रो बोइङ आखिर कसरी हरायो ? किन अलिकति भेउसमेत पाउन नसकिएको होला ?

मोबाइल चाहिँ लाग्छ, फोन उठ्दैन
एक महिना पनि भएको छैन नेपालको अर्घाखाँचीस्थित मसिनेलेकमा नेपाल वायुसेवा निगमको ट्विनअटर विमान दुर्घटना भएको। भोलिपल्ट बल्ल विमानको भग्नावशेष भेटिएको थियो। त्यतिबेला विमानका एक यात्रुको मोबाइलबाट ठाउँ पत्ता लागेको थियो। मोबाइलमा घण्टी बजे पनि उठेको थिएन। त्यसपछि त्यो नम्बरको लोकेसन ट्रेस गर्दा अर्घाखाँचीको मसिनेलेक पत्ता लागेको थियो। दुर्घटनास्थल नजिकै मोबाइलको टावर पनि थियो।

अहिले पनि यो हराइरहेको विमानका यात्रुको मोबाइलमा फोन गर्दा रिङ गएको तर नउठेको समाचार आएका छन्। चिनियाँ यात्रुका एक आफन्तले टिभीमा लाइभ मोबाइलमा फोन गरेर रिङ गएको सुनाएछन्।

चीनको यो साइटले जनाए अनुसार, १९ जना चिनिया यात्रुको परिवारले संयुक्त विज्ञप्ति जारी गर्दै आफूहरुको परिवारका सदस्यलाई मोबाइलमा फोन गर्दा लाग्ने तर नउठ्ने किन भएको भन्दै सत्यतथ्य सार्वजनिक गर्न अनुरोध गरेका छन्। उनीहरुले एयरलाइन्सलाई फोन नम्बरहरु दिए पनि त्यसलाई वास्ता नगरेकोले मलेसिया एयरलाइन्सका प्रवक्तालाई पानीको बोतलले हानेको र सत्य सार्वजनिक नगरे मलेसियाली दूतावासबाहिर प्रदर्शन गर्ने चेतावनी समेत दिएका छन्।

रहस्यमय बनेको यो घटनामा जब सबै तर्कहरु समाप्त हुन्छन्, तब नहुने समाचार लेख्ने साइटको कुरा समेत हो कि जस्तो लाग्ने रहेछ। प्यारोडी समाचार राख्ने अमेरिकाको नेसनल रिपोर्ट लेख्छ- यसको एउटा मात्र संभावित जवाफ छ, एलियन। अर्को ग्रहको प्राणीले सुरुदेखि नै बर्मुडा ट्र्याङ्गलमा जहाज अपहरण गर्थे, यस पटक अर्कै ठाउँबाट गरेको हो कि ! तर्कले काम नगरेपछि यस्ता कुरा पनि हो कि जस्तो लाग्न थाल्ने रहेछ।

[तपाईँको विचारमा यो विमान कहाँ हराएको होला ? तल कमेन्टमा आफ्नो विचार लेख्नुस्]

साभार : माई संसार