रेखा थापाले हतियार उठाउने रे !

ए राता मकै ! के सुन्नु पर्‍या हो। रेखा थापाले हतियार उठाउने रे ! भर्खरै एमाओवादी प्रवेश गरेकी देखा थापा नामले समेत जिस्क्याइने हिरोइन रेखाले अन्तर्वार्ता दिँदै आवश्यक

परे हतियार उठाउन तयार छु भनेकी रहिछिन्। यो अन्तर्वार्ता द्वन्द्वकालमा ललितपुरको भट्टेडाँडामा पुलिस मारेर ‘भट्टेडाँडामा साहसिक आक्रमण’ भन्दै भङ्गेरा टाउके अक्षरमा हेडलाइन छाप्ने ‘जनादेश’ साप्ताहिकमा छापिएको हो। हतियारै उठाउने रहर भए हतियार उठाउने धम्की दिइरहेको वैद्य माओवादीतिर नलागेर हतियार बिसाइसकेको प्रचण्ड-बाबुरामको एमाओवादीतिर किन उनी लागेकी हुन्, त्यसमा प्रश्न सोधिएको रहेनछ। जे होस्, साँच्चिकै हतियार उठाउने बेला आयो भने रेखा थापाले हतियार उठाउलान्-नउठाउलान्- हतियार उठाउने रे भन्ने चर्चाले चाहिँ सामाजिक सञ्जाल पूरै गुञ्जिएको थियो।

रेखाले अझ त्यतिले नपुगेर आफू लडाकू स्वभावकी भएको पनि चर्चा गरेका छन्। अन्तर्वार्तामा उनले भनेकी छिन्- ‘म रोल्पामा नजन्मिएर मोरङमा जन्मिए पनि लडाकु स्वभाव त छ नै ममा’

लडाकू स्वभाव, आवश्यक परे हतियार उठाउने….होशियार हुनुस् है।

गगन थापासँग कि केपी ओलीसँग लड्ने ?
अन्तर्वार्तामा आगामी संविधान सभामा गगन थापा उठेकै क्षेत्रमा रेखा थापा उठ्ने हल्लाबारे पनि प्रश्न सोधिएको रहेछ। जवाफमा उनले भनेकी छिन्- पार्टीले आवश्यक ठानेको खण्डमा म तयार छु। अझ उनले आफूले केपी ओलीको क्षेत्रमा चुनाव लड्ने हल्ला सुनेको जवाफ पनि फर्काएकी छिन्।

साभार : माई संसार