‘नागरिक’को समाचार गलत, - उडिरहेको विमानमा मोबाइल चलाउन पाइँदैन,

-पाठक-

म उड्डयन क्षेत्रका गतिविधिमा चासो राख्ने व्यक्ति हुँ। भर्खरै नेपाल एयरलाइन्सको विमान दुर्घटना भएपछि एक यात्रुको ‘अन’ रहेको मोबाइलबाट लोकेसन ट्र्याक भएको खबर आएको थियो। त्योसँगै नागरिक दैनिकमा ‘जहाजभित्र मोबाइल’ शीर्षकमा एउटा समाचार छापिएको छ। त्यसमा रहेका कतिपय जानकारी गलत छन्। यसलाई म प्रमाणसहित तपाईँहरु सामु राख्दैछु।

सबैभन्दा पहिला नागरिकन्युजमा रहेको यो खबर पढ्नुस्- जहाजभित्र मोबाइल ?
त्यसमा भनिएको छ- “अमेरिकाको अमेरिकन एयरलाइन्स र डेल्टा एयरलाइन्स, बेलायतको ब्रिटिस एयरवेज, आयरल्यान्डको र्‍यान एयर, जर्मनीको लुफ्थान्सा एयरवेज लगायतले आफ्ना तोकिएका जहाज उडानमा मोबाइल फोन, इन्टरनेट प्रयोग गर्न दिइरहेका छन्।”
म अमेरिकामा बस्छु र माथि उल्लेख गरिएका एयरलाइन्सबाट यात्रा गरिरहेको छु। त्यसैले अमेरिकाका अमेरिकन एयरलाइन्स (एए) र डेल्टा एयरलाइन्स (डिएल)को मोबाइल फोन प्रयोग नीतिबारे राम्रै जानकारी राख्छु।
म युरोपमा बस्दिनँ र युरोपेली एयरलाइन्सहरु जस्तै ब्रिटिस एयरवेज, र्‍यान एयर, लुफ्थान्सा एयरवेजमा यात्रा गर्ने मौका पाएको छैन। त्यसैले युरोपेली एयरलाइन्सबारे माथिको जानकारी सही छ कि छैन भन्ने बारे कमेन्ट गर्न सक्दिनँ। त्यसमा यात्रा गर्नुहुने तपाईँहरु कोही हुनुहुन्छ भने बढी जानकार हुनुहोला।
तर अमेरिकी एयरलाइन्सहरुको सम्बन्धमा एए र डिएलले उडानका क्रममा मोबाइल फोन प्रयोग गर्ने अनुमति दिन्छ भन्नु सरासर झुट हो। अमेरिकाका कुनै पनि एयरलाइन्सले उडानका क्रममा मोबाइल फोन प्रयोग गर्ने अनुमति दिँदैनन्। मोबाइल फोनको प्रयोग अफलाइन एप्सहरु चलाउनमात्रै गर्न सकिन्छ तर त्यसो गर्दा मोबाइल “एयरप्लेन मोड” मा हुनुपर्छ। एयरप्लेन मोडमा मोबाइल फोन हुँदा भ्वाइस वा डेटा कम्युनिकेसन हुन पाउँदैन।
एयरप्लेन मोडबाहेक अरु कुनै मोडमा मोबाइल फोन चलाउनु गैरकानुनी हुन्छ र त्यसो गर्नेलाई अमेरिकाको कानुन अनुसार सजाय हुन सक्छ।
‘नागरिक’को समाचारमा भनिएको छ-
अमेरिकन र डेल्टा एयरलाइन्समा त प्रत्येक सिटमा फोनै राखिएको हुन्छ।
एए र डिएलका सबै विमानका प्रत्येक सिटमा फोन राखिएको हुँदैन। निश्चित विमानमा मात्रै फोन राखिएको हुन्छ। समाचारमा लेखिएको “प्रत्येक सिटमा फोनै राखिएको हुन्छ” शब्दले मोबाइल फोन हो कि जस्तो भान पार्छ। तर नझुक्किनुस्, ती मोबाइल फोन नभई तारवाला फोन हुन् र क्रेडिट कार्ड प्रयोग गरी फोन गर्नुपर्छ, निकै महँगो दरमा।
अमेरिकन एयरलाइन्सको मोबाइल फोन र व्यक्तिगत विद्युतीय उपकरण प्रयोगबारे नीतिसम्बन्धी लिङ्क यहाँ छ।
डेल्टा एयरलाइन्सको मोबाइल फोन र व्यक्तिगत विद्युतीय उपकरण प्रयोगबारे नीतिसम्बन्धी लिङ्क यहाँ छ
‘नागरिक’को समाचारमा भनिएको छ-
‘त्यस्ता फोन र मोबाइल जहाज उड्ने र अवतरण गर्ने बेला भने प्रयोग गर्न पाइँदैन,’ दुई दशकदेखि जहाज उडाइरहेका एक वरिष्ठ क्याप्टेनले मंगलबार नागरिकसँग भने, ‘धेरै उचाइमा गएपछि ती जहाजमा मोबाइल फोन प्रयोग गर्न पाइन्छ।’
वरिष्ठ क्याप्टेनले पत्रकारलाई झुक्याइदिएछन् हाइ अल्टिच्युडमा मोबाइल फोन प्रयोग गर्न पाइन्छ भन्दै। Federal Communication Commission (FCC)र Federal Aviation Administration (FAA) ले उडानका क्रममा मोबाइल फोन प्रयोग गर्ने अनुमति दिँदैन, विमानको उचाइ चाहे जतिसुकै किन नहोस्। तर माथि भनिए जस्तै मोबाइल फोन उडानका क्रममा एयरप्लेन मोडमा भने चलाउन पाइन्छ।
FCC अनुसार मोबाइल फोन प्रयोग नीतिबारे बढी जानकारी यहाँ छ।
FAA अनुसार PED को प्रयोग बारे बढी जानकारी यहाँ छ।
‘नागरिक’को समाचारमा लेखिएको छ-
यही घटनापछि अमेरिकन एयरलाइन्स, डेल्टा लगायत अन्यले मोबाइल सुविधा दिन थालेका हुन्।
लेखकले अमेरिकामा सेप्टेम्बर ११ को घटनापछि एए र डिएलले मोबाइल फोन प्रयोग गर्ने अनुमति दिएको उल्लेख गरेका छन्। तर वास्तविकता के हो भने आजसम्म पनि उडानका क्रममा अमेरिकामा मोबाइल फोनको प्रयोग प्रतिबन्धित छ FCC को नियम अनुसार।
थप प्रमाणका लागि मैले यहाँ ती आधिकारिक वेबसाइटका स्क्रिनसटहरु पनि राखेको छु-

FCC को मोबाइल फोन नीति

FAA को PED नीति

डेल्टा एयरलाइन्सको नीति

अमेरिकन एयरलाइन्सको नीति

अमेरिकन एयरलाइन्सको नीति

साभार : माई संसार